List

Familien til Marius har bygd ei fantastisk tømmerhytte i Beiarn – eit eldorado for skikøyring berre halvanna times køyring heimefrå. Natt til laurdag snødde det masse i Bodø og dumpa fjonlett puddersnø i Beiarn. Me kom oss i bilen tidleg laurdag morgon. Magnus er som kjend ein morgonfugl, så klokka åtte hadde me vore vakne i timesvis og stod klar utføre butikken for å handla til hyttehelg. Me vaksne hadde laga ei handleliste, så det ville Magnus også. På hans stod det i følgje han sjølv: sjokolade og slikkepinne.

IMG_8224

Klokka ti var ikkje vegen opp til hytta brøyta endå. Me lessa varene og Magnus i pulken og byrja jobben med å slepa heile lasset opp bakkane. Marius gjekk i forvegen for å fyra opp i hytta. Det slo meg at me kanskje heller skulle ha leika ein halvtime og venta på brøytebilen, men når eg no først var i gang med å trekka pulk, så vart det at eg gjekk opp.IMG_8208

Hytta har ikkje innlagt vatn eller straum, og der er ingen ovn å ringa til for å skru på varmen. Med tjukke tømmerveggar som held godt på kulda kan de ta nokre timar å få hytta på plussida av gradestokken. Men med ein lang mildvêrsperiode dei siste vekene og så litt varmande marssol var det fort gjort å sprengfyra seg opp i tjue grader medan ungen kosa seg med bøtte og spann på terrassen.

IMG_8193

Eg var den heldige vinnaren av ein ettermiddagstur opp lia bak hytta og fekk eit gjensyn med iskald vår, slik han gjerne er på fjellet i nord. Kulda reiv godt i pusten og den lille trekken som drog over fjellsida var isande kald. Ein lang og lys ettermiddag med sol, fjell og skispor. På veg ned fekk eg meg tre puddesvingar i lia. Akkurat nok til å konstatera at det var draumeføre i skogen, og at ein gjerne skulle vore heile dagen i Draumeskogen i Beiardalen.

IMG_8192

Etter skreimiddag, oppvask og legging av Magnus tente me stearinlys og la oss i sofaen og las i det dunkle lyset. Frå terrassen er der få andre lys å sjå og stjernehimmelen trådte fram mellom skyene med mykje meir djubde og fleire stjerner enn det er mogleg å sjå i byen. Mørkre – det har eg drøymd om kveld etter kveld i byggefeltet vårt, der det dessverre er så alt for mykje lys frå hus, gatelykter og det rosaaktige skinet frå byen.

IMG_8203

Søndag var det duka for familietur. Puddersnø eigner seg på mange måtar betre til å køyra nedoverski enn å trekka pulk i oppoverbakke. Det er forsåvidt noko eg har notert meg tidlegare – til dømes på dei mange langturane med Katrine og Eli. Men samstundes er eg over gjennomsnittet glad i å trekka pulk, så me hadde ein fin tur opp lia, Marius og eg, med Magnus sovande nedi pulken.

IMG_8220

På veg heim var konklusjonen klår og samstemd: Alle var samde om at det hadde vore ein fin tur, og at me må koma oss på hytta oftare.

Legg att eit svar

Epostadressa di blir ikkje synleg. Påkravde felt er merka *

  Posts

februar 4th, 2020

Rom for meir ros i akademia

Kritikk speler ei viktig rolle i akademia. Både som rettleiarar, kollegar og fagfellar er det å vurdera andre sine oppgåver, […]

januar 10th, 2020

Eit organisert angrep på seksuelle og reproduktive rettar

“Me har eit kort tidsvindauge på mellom 10 og 20 år. Dersom me ikkje nyttar dette vindauget kan den vestlege […]

januar 1st, 2020

Nyttårshåp – fem ønske for det nye tiåret

Måtte 2020 bli det året der me verkeleg tek inn over oss det trugsmålet som klimaendringar og naturøydeleggjing er får […]

desember 17th, 2019

Pepperkake spesial

I fjor laga me pepperkaker, Marius, Magnus, naboane og eg. Eg trur det må vera første gongen eg har laga […]

november 24th, 2019

Folkemord eller forbrytelser mot menneskeheten?

Korleis skal me laga eit internasjonalt rettsvern som på beste og mest mogleg effektive måte kan trygga folk mot forfølging […]

november 18th, 2019

Sommarminner

Det er ingen eg har vore så mykje på tur i lag med som Eli og Katrine. Sommarens høgdepunkt var […]

november 5th, 2019

Revisjonssmerter

Etter ni månader venting og tre purringar dukka endeleg e-posten med det karakteristiske tittelfeltet – #JPOA-D-18-00047 – DECISION – opp […]

oktober 26th, 2019

Svangerskapskvalme må takast på alvor i helsevesenet

90 % av alle gravide blir kvalme, halvparten kastar opp og om lag 15 % blir alvorleg kvalme. Der finst […]

oktober 26th, 2019

Skrivetid saman

Eg skriv mykje. Store delar av jobben min går ut på å skriva rapportar, vitskaplege artiklar, søknader, kronikkar og føredrag. […]

oktober 12th, 2019

Nede for teljing

Eg har aldri før følt meg så sjuk som denne hausten. Eg har mest ikkje greidd å stå på beina. […]