Før rabarbrasesongen er over må eg dela oppskrifta på denne fabelaktige smulepaien eg fekk hjå Tone Hellesund i Bergen i vår. Kaka er knallgod og superenkel å laga!
Fordel rabarbra i bitar i ei lita paiform eller eldfast form. Smuldre og bland saman:
- 100 gram mjukt smør
- 1 dl sukker
- 2 ts vaniljesukker
- 1,5 dl kokosmass
- 1 dl brødsmular/strøkavring/griljermjøll/glutenfritt mjøl
Fordel denne massen over rabarbraen og steik kaka på 200 grader i 25-30 minutt. Bland eventuelt litt potetmjøl i sukkeret for at rabarbraen i botn skal bli litt tjukkare. Servera med god vaniljeis. Eg kan dessutan tenkja meg at krem eller mascarponekrem også kan høva godt.
Smulepaien på bildet er laga av 4 gonger originaloppskrifta, til eit enkelt familieselskap i Eggebø/Vassbø-klanen.
I smulepaien kan du erstatta rabarbra med alt frå epler til fersken. Berre å prøva seg fram, tenkjer eg.
Bon appetitt!