Det som er kjekt for ungane er gjerne moro for dei vaksne òg. Eg nemner i fleng: Mummitrollet, godteri når ein ikkje har lov, bade, boksen går, eventyr rund bålet og så bortetter. På søndagsturen herom dagen oppdaga me noko heilt magisk!
Nokre få hundre høgdemeter oppi bakken hang det plutseleg ein lapp om at det skulle vera sjeldne blomar i området. Eg nett hadde vore på tur for å finna den sjeldne blomen Marisko, og var i det botaniske hjørnet.
Derfor vart eg først litt irritert over at det berre stod fargen på blomen på dette skiltet, og ikkje namnet. Eg skulle til å gå forbi, men tok ein liten kikk mellom einarbuskane og fekk auge på denne:
Haha! For eit fabelaktig påfunn! Eit aldri så lite magisk innslag på søndagsturen! I tråd med instruksane plukka eg éin, i von om at det vil koma fleire til neste år.
Dette fabelaktige påfunnet viste seg å vera ein del av barnas turdag på Leines. Dessverre vart barnearrangementet avlyst på grunn av sterk vinn og snø på fjellet (datoen var 14. juni….). Men det var i alle fall nokon som visste å setta pris på blomane likevel.
