List

Det var ein gong ein profesjonell dirigent frå Europa som kom for å bu i Steigen. Ho vart den nye dirigenten for Steigenkoret – det lokale kyrkjekoret.

Livets tilfeldigheiter ville ha det til at den anerkjente Mezzosopranen Soetkin Baptist kom frå storbyen i Belgia til den nordnorske utkantbygda Steigen. Med den magiske kombinasjon av humor og sjarm på den eine sida, og musikalsk ekseptertise og presisjon på den andre sida, har ho løfta Steigenkoret til nye høgder.

Innan eg sjølv landa i Steigen hadde eg bestemt meg for å bli med i koret. Men ikkje ante eg at røynda var så godt som nøyaktig lik historia i den varme og humoristiske svenske filmen Så som i himmelen.

IMG_5685

Då eg kom til Steigen i september, var koret i gang med innøvinga av Gloria av Vivaldi. Eit fantastisk stykke barokkmusikk!

Det er god stemning på øvingane. Etter ein times tid med intenst musikalsk arbeid er det klart for kaffi! Alle kjøper lodd til inntekt for koret. Premien er to sjokoladar, som me delar mellom oss, same kven som vinn.

Sjølv har eg ikkje drive med musikk på godt over 10 år. Men heldigvis var det hjerterom og husrom til nok ein altstemme til i Steigenkoret. Eg vart dermed inkludert i blandakoret, heilt utan opptaksprøve.

Det er ikkje alltid lett å halda oppe motet på øvingane når stemma er vanskeleg, barokkharmoniane kompliserte og mindre enn halvparten av oss kan lesa noter. Kjem dette eigentleg til å gå bra? Få veker innan konserthelga var det fleire ting som ikkje var på plass.

IMG_5683

Men då Soetkin kom tilbake frå Belgia for å dirigera oss gjennom nokre siste intense øvingar før konserten, vart me overtydde om at dette kunne gå. Når Soetkin hadde trua på oss, då måtte det bli bra!

Etter ein vellukka premierekonsert i Leiranger kyrkje på Leines, med over hundre av innbyggarane i den vesle kommunen vår til stades for å høyra på, reiste me med buss til Bodø for å sjarmera publikum i byen.

IMG_5722

Søndag føremiddag satt heile koret på plass i bussen for å køyra dei tre-fire timane det tek til Bodø utan båten. Det stinka brent plast i bussen etter at kaffitraktaren hadde eksplodert tidlegare på føremiddagen. Koristane harka, klødde i halsen og var uroa over kva effekt dette hadde på stemma. Men som me seier i Steigen: “Det går berre godt!”

Då bussen skulle rygga ut køyrde han rett i busskuret bak oss. “Nei, nei, nei, stopp!”, gaula heile den bakre delen av bussen. Men sjåføren berre peisa full fart framover igjen, og drog i samen slengen med seg busskuret som no hang fast i bussen. “Pass, stopp!” kauka resten av bussen då busskuret på hengande håret unngjekk å bli slept rett inn i ein av bilane som sto parkerte. “Har vi glømt nån?” spurde bussjåføren og køyrde uaffisert mot Bodø.

Med strikking, matpakke og gode historiar gjekk bussturen fort. Siste minuttane gjekk med til felles oppvarming, dirigert av Soetkin som sto framme i bussen og heldt seg fast.

Akustikken i Bodin kyrkje i Bodø var fantastisk. Med Brøstadbotn Barokkorkester, to dyktige solistar og fullt trøkk frå koret vart det verkeleg ein bra konsert. Som Soetkin entusiastisk sa: “Det var musikk! Og musikk treng ikkje vera perfekt. Det handlar om å uttrykka noko ekte”.

IMG_5687

Hugsar de dirigenten i Så som i himmelen? Det han var lei av var perfeksjonisme, teknikk, kritikk og overflatiskheit. Det handlar om å laga musikk som rører folk.

Og no er Steigenkoret snart klar for Europaturné og dokumentarfilminnspeling. Hadde ikkje det vore noko? Gje oss ein regissør og ein manager, så blir det neste års absolutte publikumssuksess.

Foto: Helga Eggebø

Her er lydopptak frå konserten.

One Response to “Så som i himmelen”

  1. Trine Normann

    Stå på alle sammen. Dette går bærre fint! Ækte vare er det vi trenger. ..der sjæla bli brukt!

Leave a Reply

Your email address will not be published.

  Posts

June 23rd, 2022

Kva burde tordivelen?

Heilt frå eg vakna den morgonen kokte hovudet over av alt eg burde ha gjort. Eg må hugsa å kjøpa […]

June 10th, 2022

Å sjå ein snegl inn i augene

Eg hadde rusla ut mot Mørkvedodden for å vera litt i fred. Eg gjekk gjennom skogen, forbi kvitveisane og den […]

May 27th, 2022

Kva med å ta litt lett på det?

Ein kollega kom innom ein dag og fortalde at fleire av tekstane mine er trekt fram i boka “Kunsten å […]

May 27th, 2022

10 måtar å endra verda på sykkel

Kvar gong du kastar deg på sykkelen og suser nedover sykkelstien langs riksvegen reduserer du trafikkgrunnlaget for det neste vegprosjektet. […]

May 10th, 2022

Transportrevolusjon

Like før Ingeborg skulle byrja i barnehagen kjøpte eg meg elsykkel. Eg hadde høyrd mange tala entusiastisk om dette transportmiddelet, […]

May 3rd, 2022

Kom og få deg ein vaffel!

Farmor og farfar hadde alltid vaffelrøre ståande klar i kjøleskapet. For meg og brørne mine, som budde i nabohuset, var […]

April 26th, 2022

Å trøysta ho som skrik

Ingeborg hoppa opp av senga klokka 0500. “Dædig lalla”, erklærte ho. (Ferdig å lalla, det vil seia sova). Det er […]

April 20th, 2022

It’s for commercial purposes

Siste dagen i påska vart eg sitjande å jobba fordi eg heller ville på tur i finvêret som var meldt […]

February 25th, 2022

Samtalar med Steigen og Tana

Korleis kan me utvikla kvalitative metodar som legg til rette for gode faglege samarbeid? I denne spalta har eg delt […]

January 18th, 2022

Kjenner ho deg att?

Det er ikkje ofte forskingsartiklar får meg til å grina. Eg trur kanskje aldri det har skjedd før. Men då […]